Sot në hapësirat e Komunës së Ulqinit u mbajt një takim me përfaqësuesin e Këshillit Rom, Mensur Shaljaj, dhe kryetarin e Bordit Drejtues të Këshillit Rom, Enes Ukoviq.
Ata u pritën nga nënkryetarët e komunës, Beqir Sellaj dhe Petar Deliq, sekretarja për kulturë dhe veprimtari shoqërore Merita Subashiq Shabanoviq me bashkëpunëtoren e saj Aldina Nikoçeviq, si dhe Marina Kastrati, drejtoresha e Qendrës për Punë Sociale për komunat Tivar dhe Ulqin.
Gjatë takimit u diskutua për pozitën e këtij komuniteti dhe mundësitë për përmirësimin e standardit jetësor të anëtarëve të tij.
Vëmendje e veçantë iu kushtua lehtësirave në sigurimin e dokumentacionit personal, procesit të legalizimit të objekteve, çështjeve të banimit social, si dhe iniciativës për hapjen e një zyre për popullsinë Rome dhe Egjiptiane në kuadër të Komunës së Ulqinit. U diskutua gjithashtu edhe për organizimin e transportit të nxënësve nga radhët e komunitetit RE, me qëllim që të lehtësohet qasja në arsim dhe të inkurajohet shkollimi i rregullt i fëmijëve.
Përfaqësuesit e Komunës së Ulqinit shprehën gatishmërinë që, në bashkëpunim me institucionet përkatëse dhe përfaqësuesit e komunitetit, të vazhdojnë punën në krijimin e kushteve më të mira për jetesë dhe për përfshirje të plotë sociale të popullsisë RE në jetën shoqërore.
Komuna e Ulqinit do të vazhdojë edhe në të ardhmen të punojë në mënyrë të vazhdueshme për përmirësimin e cilësisë së jetës dhe kushteve në komunitetin lokal, në mënyrë që të gjithë qytetarët të kenë mundësi të barabarta për përparim dhe jetë të denjë.
.jpg?v=2025-11-28_10:12:24)
