Në Ulqin qëndroi për vizitë bashkëkryetari i të Gjelbërve Thomas Waitz. Ai fillimisht u takua me zyrtarët komunal më pas një takim tjetër u zhvillua me Kryetarët e Klubeve, këshilltarë dhe përfaqësues të sektorit civil.
Kryetari i Ulqinit Genci Nimanbegu dhe Kryetari i Lëvizjes Qytetare Ura, Deputeti Dritan Abazović duke iu falënderuar Eurodeputetit për vizitën edhe njëherë shprehën shqetësimin e thellë lidhur me Marrëveshjen mes Malit të Zi dhe Emirateve të Bashkuara Arabe që ka të bëjë me bashkëpunimin në fushën e turizmit dhe investimit në sektorin e patundshmërisë dokument, që Presidenti i Malit të Zi, Jakov Millatoviq e ktheu për rishqyrtim në Parlament, për shkak se është në kundërshtim me ligjet dhe Kushtetutën e shtetit, ndërkohe që sot Deputetët do ta votojnë përsëri.
Ata përsëritën qëndrimin e përbashkët të gjithë subjekteve politik në Ulqin se ky dokument është i papranueshëm dhe i dëmshëm për Ulqinin dhe banorët e tij dhe se Marrëveshtja bie ndesh me standartet evropiane qe janë synimi ynë. Për Eurodeputetin Waitz, çështja e Plazhit të Madh, dhe Kripores janë çështje që nuk i përkasin vetëm Malit të Zi por tërë Evropës, andaj si të tilla atyre duhet qasur me seriozitet dhe konformë standardeve Evropiane.
