Pas një takimi tejet konstruktiv me Kryesinë e KF Otrant Olympic, janë përcaktuar prioritetet për sezonin e ardhshëm dhe është hartuar plani i punës që do të fokusohet në realizimin e objektivave sportive dhe zhvillimore të klubit.
Besojmë se, përmes angazhimit të përbashkët të shtabit teknik, drejtuesve të klubit, Komunës së Ulqinit dhe sponsorëve tanë, KF Otrant Olympic do të arrijë të ruajë statusin e tij në Ligën e Parë, duke forcuar njëkohësisht kapacitetet sportive vendore dhe duke afirmuar talentet e rinj.
Tifozëve tanë u bëjmë me dije se të gjithë akterët do të jenë maksimalisht të përkushtuar ndaj objektivit të përbashkët - një sezoni të suksesshëm dhe përfaqësimit dinjitoz të klubit. Një vëmendje e veçantë do t’i kushtohet promovimit të Ulqinit, potencialeve të tij sportive dhe vlerave të pasura tradicionale.
Na gëzon veçanërisht fakti që në krye të shtabit teknik gjatë sezonit të ardhshëm do të jetë Milija Savoviq, i cili me punën, dijen dhe rezultatet e arritura në fund të sezonit të kaluar dëshmoi edhe një herë pse konsiderohet një nga trajnerët më të mirë të futbollit në Mal të Zi.
Vëmendje të madhe do t’i kushtojmë përmirësimit të infrastrukturës sportive dhe krijimit të kushteve më cilësore për zhvillimin e futbollit për të gjitha kategoritë, nga grupmoshat më të reja deri te skuadra e parë.
Nga të gjithë presim punë serioze, disiplinë dhe përkushtim të plotë, sepse vetëm përmes unitetit, përgjegjësisë dhe angazhimit të vazhdueshëm mund t’i arrijmë objektivat e vendosura dhe t’i shndërrojmë ambiciet tona në sukses.
Përpara Otrant!
Përpara Ulqin!
