Hapet zyrtarisht stadiumi i rinovuar "Olympic"

Të nderuar qytetarë,

Të dashur dashamirës të sportit,

Ndihem jashtëzakonisht krenar që një ëndërr brezash, me përkushtim të madh, qasje serioze dhe mbështetjen e partnerëve, po bëhet realitet. Me këtë, po hapim një kapitull të ri në 104 vite histori futbolli në qytetin tonë.

Me ndeshjen ndërmjet “Otrant Olympic” dhe kampionit të ri shtetëror, ekipit “Budućnost” nga Podgorica, është hapur zyrtarisht stadiumi i rinovuar “Olympic”.

Falënderoj Federatën e Futbollit të Malit të Zi, me në krye z. Dejan Savićević, për partneritetin kyç në realizimin e këtij projekti. Ky model bashkëpunimi është shembull që duhet ndjekur në investimet e ardhshme në sport dhe infrastrukturë. Gjithashtu, shpreh mirënjohje për Ministrinë e Sportit, e cila gjatë vizitës së saj të parë zyrtare në Ulqin pati si destinacion pikërisht stadiumin “Olympic”.

Përgëzoj përfaqësuesit e “Otrant-Olympic” dhe të gjitha ndërmarrjet publike për përkushtimin dhe punën e palodhshme që kanë mundësuar përfundimin me sukses të këtij projekti.

Sot, Ulqini ka Ligën e Parë në futboll dhe një stadium bashkëkohor me hapësira moderne, tribunë me 715 ulëse dhe tribunë të veçantë për tifozët mysafirë me 96 vende, fushë me bar natyral dhe sistem modern ujitjeje që përmbush të gjitha standardet e UEFA-s.

Ftoj të gjithë qytetarët që të besojmë dhe të mbështesim klubin tonë në përpjekjen për të qëndruar në Ligën e Parë të Futbollit - sepse, si gjithmonë, viti i parë është më i vështiri.

Së bashku për sportin, së bashku për Ulqinin!

Kryetari i Komunës

Genci Nimanbegu