Komuna e Ulqinit është e përkushtuar në punën që do të përmirësojë kujdesin për fëmijët në komunitetin tonë. Kështu, në Komunën e Ulqinit u mbajt një seminar dy-ditor, i cili mblodhi asistentë në mësimdhënie, psikologë, logopedë dhe të gjithë ata që merren me sfidat me të cilat përballen fëmijët me vështirësi në të folur.
Seminari u realizua me mbështetjen e fondacionit danez Margit Nielsen dhe nën drejtimin e shkëlqyer të Rea Vuksan, eksperte me përvojë shumëvjeçare ndërkombëtare në zbatimin e Analizës së Aplikuar të Sjelljes (ABA) në punën me fëmijët me autizëm.
Kjo temë është me rëndësi të jashtëzakonshme, pasi komunikimi përbën bazën e çdo zhvillimi, dhe fëmijët me vështirësi në të folur dhe komunikim kërkojnë vëmendjen, ekspertizën dhe mbështetjen tonë të veçantë për të zhvilluar potencialin e tyre.
Një nga segmentet kyçe të punës gjatë këtyre dy ditëve ishte komunikimi përmes simboleve figurative, i cili përfaqëson një nga format e komunikimit të mbështetur. Kjo metodë, siç tregon praktika, përshpejton zhvillimin e të folurit dhe u mundëson fëmijëve me vështirësi të shprehin më lehtë nevojat, dëshirat dhe mendimet e tyre. Kjo është me rëndësi të madhe si për pavarësinë e tyre, ashtu edhe për përmirësimin e cilësisë së jetës.
Ky seminar nuk është vetëm një mundësi për të përvetësuar njohuri të reja, por edhe për shkëmbimin e përvojave, kërkimin e përbashkët të zgjidhjeve dhe krijimin e qasjeve inovative që do t’i ndihmojnë fëmijët me vështirësi të arrijnë potencialin e tyre të plotë.
Së bashku, mundemi dhe duhet të bëjmë shumë që çdo fëmijë të ketë shanse të barabarta për zhvillim dhe sukses.
Jemi të sigurt se njohuritë e marra këtu do të përmirësojnë punën e tyre dhe do të kontribuojnë që ata të jenë edhe më efikasë në ofrimin e mbështetjes për fëmijët që përballen me këto sfida.
Seminari u mbajt nën koordinimin e Nela Miloviq, këshilltare në Kuvendin e Komunës së Ulqinit, në bashkëpunim me Sekretariatin përkatës dhe Kabinetin e Kryetarit të Komunës së Ulqinit.
.jpg?v=2025-11-28_10:12:24)
