Komuna e Ulqinit, në kuadër të kompetencave të saj të rregullta dhe në përputhje me dispozitat ligjore në fuqi, ka nisur aktivitete të orientuara drejt rregullimit dhe përmirësimit të mënyrës së shfrytëzimit të tokës shtetërore dhe komunale, me qëllim ruajtjen e pronës publike dhe vënien e saj plotësisht në funksion të interesit të komunitetit lokal dhe qytetarëve.
Procedurat janë iniciuar në bazë të evidencave zyrtare dhe njohurive të disponueshme se në disa lokacione toka shtetërore dhe komunale po shfrytëzohet pa bazë të përshtatshme ligjore. Një nga rastet e evidentuara ka të bëjë me një lokalitet pranë plazhit “Miami”, në një zonë atraktive të Plazhit të Madh, ku me vendim konkursi është planifikuar ndërtimi i stadiumit të qytetit, terreneve ndihmëse dhe objekteve të tjera sportive me përmbajtje shoqëruese.
Nga shqyrtimi i dokumentacionit zyrtar është konstatuar se parcela kadastrale nr. 29/6, KK Shtoji i Poshtëm, është në pronësi të shtetit të Malit të Zi, ndërsa e drejta e administrimit i është besuar Komunës së Ulqinit në bazë të vendimit të Qeverisë së Malit të Zi. Duke pasur parasysh obligimin që toka shtetërore të administrohet ekskluzivisht në përputhje me dispozitat ligjore në fuqi, është urdhëruar kryerja e mbikëqyrjes inspektuese dhe verifikimi i dokumentacionit mbi bazën e të cilit shfrytëzohet toka në fjalë.
Duke qenë se Komuna e Ulqinit nuk disponon të dhëna për shfrytëzuesin e ligjshëm dhe as për bazën juridike të shfrytëzimit të parcelës përkatëse, është iniciuar procedura verifikuese. Gjatë procedurës është konstatuar se toka përdoret për vendosjen e terreneve sportive, të cilat shfrytëzohen nga subjekte dhe klube që nuk janë të regjistruara dhe nuk janë të lidhura në mënyrë organizative me Komunën e Ulqinit.
Policia komunale, në kuadër të kompetencave të saj, ka tentuar në disa raste të vendosë kontakt me shfrytëzuesin e tokës dhe t’i drejtojë ftesë për deklarim, por pa sukses. Me shkresë të Ndërmarrjes Publike për Menaxhimin e të Mirave Detare është konfirmuar se lokacioni më herët i ishte dhënë në përdorim Milorad Çausheviqit nga Ulqini, i cili evidentohet si shfrytëzues i mëparshëm.
Pavarësisht përpjekjeve disaditore për vendosjen e komunikimit, personi i përmendur nuk iu është përgjigjur thirrjeve të shërbimeve kompetente. Duke pasur parasysh se bëhet fjalë për tokë shtetërore, shfrytëzimi i së cilës është i mundur vetëm në bazë të vendimeve dhe kontratave të vlefshme, organet kompetente, në përputhje me ligjin, kanë kryer mbylljen e përkohshme të objekteve dhe kanë lënë njoftim për detyrimin e paraqitjes pranë Policisë Komunale.
Gjatë së njëjtës ditë është pranuar një njoftim se terreni në fjalë po përdoret për stërvitjet e KF Vllaznia nga Shkodra. Personat zyrtarë kanë dalë sërish në vendngjarje dhe kanë konstatuar heqjen e paautorizuar të vulave zyrtare, për çka është kërkuar asistenca e Drejtorisë së Policisë. Me mbërritjen e patrullës policore, terreni ishte tashmë i braktisur, pas së cilës është përpiluar dokumentacioni përkatës zyrtar.
Komuna e Ulqinit dëshiron të theksojë se kjo lokacion përfaqëson vetëm një nga disa lokacione në territorin e komunës ku edhe në periudhën e ardhshme do të zbatohen procedura të njëjta ligjore, me respektim të plotë të të drejtave të të gjithë qytetarëve dhe me veprim transparent të organeve kompetente. Qëllimi i këtyre aktiviteteve nuk është represioni, por vendosja e rendit dhe ligjshmërisë në shfrytëzimin e pronës publike.
Kujtojmë se Komuna e Ulqinit gjatë vitit të kaluar, në bashkëpunim me Federatën e Futbollit të Malit të Zi dhe partnerë të tjerë, ka realizuar një investim të rëndësishëm në adaptimin e stadiumit “Olympic”, si dhe se si themeluese dhe financuese kryesore e KF Otrant Olympic, vazhdimisht investon në zhvillimin e infrastrukturës sportive, gjë që dëshmohet edhe nga investimet e reja të planifikuara në terrene sportive dhe pista atletike.
Njëkohësisht, Komuna e Ulqinit thekson qartë se çdo tokë shtetërore ose komunale që rikthehet në regjim të ligjshëm shfrytëzimi do të vihet në shërbim të qytetarëve dhe komunitetit lokal. Në përputhje me planet zhvillimore, një pjesë e këtyre sipërfaqeve do të destinohet për krijimin e parqeve të qytetit, zonave të gjelbra dhe hapësirave për rekreacion, si dhe për ndërtimin e një qendre ditore për fëmijët me pengesa në zhvillim, duke konfirmuar kështu një qasje shoqërisht të përgjegjshme dhe gjithëpërfshirëse në menaxhimin e pronës publike.
Komuna e Ulqinit do të vazhdojë edhe në periudhën e ardhshme të zbatojë me përkushtim procedurat ligjore, përmes dialogut të hapur dhe bashkëpunimit me qytetarët, me qëllim që prona publike të përdoret ekskluzivisht në interesin publik dhe për të mirën e të gjithë qytetarëve të Ulqinit dhe të Malit të Zi.
Gjithashtu, u bëjmë thirrje policisë dhe prokurorisë që, në kuadër të kompetencave të tyre, të ofrojnë mbështetje aktive për aktivitetet që Komuna do të ndërmarrë me qëllim lirimin e të gjitha hapësirave publike të uzurpuara në mënyrë të paligjshme.
