Makineri e re e shumëfukcionale për deponinë e përbashkët sanitare të Ulqinit dhe Tivarit

Me mbështetjen e Bashkimit Evropian, për deponinë rajonale sanitare Mozhura është blerë një makinë e kombinuar - ekskavator-ngarkues Caterpillar 444 07. Përveç makinës bazë, janë blerë edhe pajisje shtesë - çekan hidraulik (pickhammer) dhe grabitëse rrotulluese.

Në ceremoninë e organizuar me këtë rast në deponinë Mozhura, të pranishmëve iu drejtuan kryetarët e komunave tëUlqinit dhe Tivarit, Genci Nimanbegu dhe Dushan Raiçeviq, drejtori i Deponisë Senad Arabeloviq dhe menaxheri i projektit R10D3, Blerim Zeneli.

Makineria shumëfukcionale është blerë në kuadër të projektit R10D3 - Përmirësimi i infrastrukturës për menaxhimin e mbetjeve dhe integrimi i 10 parimeve të ekonomisë rrethore për zhvillim të qëndrueshëm në Ulqin, Vinkovci dhe Orashje, i cili bashkëfinancohet nga Bashkimi Evropian përmes programit Interreg IPA Kroaci - Bosnjë dhe Hercegovinë - Mal i Zi. Vlera e makinerisë së blerë me pajisjet shtesë është 149.193 euro, nga të cilat 85% janë financuar nga Bashkimi Evropian.

Në periudhën në vijim, në kuadër të të njëjtit projekt, do të instalohen katër smart kontejnerë gjysmë-nëntokësorë në Komunën e Ulqinit, si pjesë e aktiviteteve pilot të Komunës së Ulqinit dhe Qytetit të Orashjes, duke ndjekur shembujt e praktikave të mira të Qytetit të Vinkovcit.

R10D3 është projekt që ka për qëllim të përmirësojë sistemet ekzistuese të menaxhimit të mbetjeve në zonën ndërkufitare të qyteteve partnere, të zhvillojë infrastrukturë të re dhe të rrisë vetëdijen dhe njohuritë e aktorëve relevantë dhe të publikut të gjerë për rëndësinë e kalimit në ekonomi rrethore. Në kuadër të projektit janë planifikuar edhe aktivitete të shumta promovuese dhe edukative, si punëtori në shkolla mbi temën e ekonomisë rrethore, si dhe trajnime intensive për përfaqësues të institucioneve dhe sektorit privat.

Implementimi i projektit R10D3 ka filluar më 15 korrik 2024 dhe do të zgjasë 30 muaj.