Kryetari i Komunës së Ulqinit, Genci Nimanbegu, së bashku me bashkëpunëtorët e tij, priti Presidentin e shtetit të Malit të Zi - Jakov Milatoviq.
Nimanbegu vlerësoi lart vizitën dhe shprehu shqetësimin e udhëheqjes së Ulqinit dhe të qytetarëve të tij lidhur me Marrëveshjen e nënshkruar ndërmjet Malit të Zi dhe Emirateve të Bashkuara Arabe në fushën e turizmit dhe zhvillimin e patundshmërive. Ai njoftoi Presidentin për takimet e njëpasnjëshme që ka pasur me Kryeministrin Spajiq, për hapat e ndërmarrë, përfundimet e sjella në dy seanca të Kuvendit të Ulqinit, si dhe për kërkesat e adresuara në zyrat përkatëse, ambasadat dhe kancelaritë në vend dhe në Bruksel.
“Ne presim nga Ju, zoti President, që me autoritetin dhe kompetencat që ju jep Kushtetuta e vendit, të na ndihmoni dhe të na përkrahni në këtë moment tepër të rëndësishëm për Ulqinin dhe qytetarët e tij, sepse vlerësojmë se marrëveshja, ashtu siç na është prezantuar, bie ndesh me Kushtetutën e vendit, interesat tona dhe dokumentet në fuqi,” - tha Nimanbegu.
Presidenti Milatoviq shprehu gjithashtu shqetësimin e tij lidhur me marrëveshjen. Ai i ka bërë apel Parlamentit që kjo marrëveshje të mos shqyrtohet, ashtu siç është paralajmëruar, deri sa Komisioni Evropian dhe agjencitë përkatëse në Mal të Zi të japin vlerësimin e tyre.
Presidenti theksoi se edhe sektori joqeveritar dhe aktorë të tjerë shoqërorë kanë bërë apel që marrëveshja të mos shqyrtohet me procedurë të përshpejtuar dhe të merren parasysh shqetësimet e Komunës së Ulqinit.
“Besoj se mirëkuptimi do të dominojë dhe se ende jemi në kohë për të zgjidhur dilemat e ngritura. Të gjithë jemi për investime, por ato duhet të jenë të qëndrueshme dhe në përputhje me Kushtetutën dhe ligjet në fuqi në Mal të Zi,” - deklaroi Presidenti Milatoviq.
