Komuna e Ulqinit, përkatësisht Qendra për Sistemin e Informacionit në bashkëpunim me Sekretariatin për Financa dhe Buxhet (Sektori për të hyra publike), njofton qytetarët se ka lansuar paketën e parë të shërbimeve elektronike në portalin zyrtar të Komunës.
Ky projekt shënon një hap të rëndësishëm drejt modernizimit të administratës lokale dhe rritjes së transparencës. Përmes shërbimit të ri "Taksat e mia", tatimpaguesit nuk kanë më nevojë të presin në sportele për të siguruar dokumentacionin e nevojshëm apo për të verifikuar detyrimet e tyre.
Çfarë mund të përfitoni online? Nga sot, qytetarët dhe bizneset mund të kenë qasje të menjëhershme dhe të shkarkojnë:
-
Vendimet për tatimin në patunshmëri (për objekte dhe tokë).
-
Vendimet për taksën turistike.
-
Pasqyrën e detyrimeve dhe pagesave të kryera në kohë reale.
Si të qaseni në shërbim? Procedura është e thjeshtë dhe kërkon vetëm pak minuta:
-
Vizitoni portalin: https://www.ul-gov.me/shrbimi-pr-qytetar/taksat-e-mia
-
Shënoni Numrin tuaj të Amzës (JMBG) ose numrin e regjistrimit të biznesit (PIB).
Ky shërbim është veçanërisht i dobishëm për qytetarët tanë në diasporë, duke u mundësuar atyre që t'i kryejnë obligimet e tyre nga kudo që ndodhen. Komuna e Ulqinit mbetet e përkushtuar në digjitalizimin e mëtejshëm për të qenë një servis sa më efikas për qytetarët.
